ශ්‍රී ලංකා – නවසීලන්ත ටෙස්ට් ක්‍රිකට් තරගාවලියේ දෙවැනි සහ අවසන් තරගය අද (26) ගාල්ල ජාත්‍යන්තර ක්‍රිකට් ක්‍රීඩාංගණයේදී අද (26) පැවැත්වෙනවා.
එහිදී කාසියේ වාසිය දිනා ගැනීම ශ්‍රී ලංකා කණ්ඩායම සමත් වූ අතර ඔවුන් තීරණය කළේ පළමුව පන්දුවට පහර දීමටයි.
පළමු ටෙස්ට් තරගයෙන් සුපිරි ජයක් හිමිකර ගත් සිංහයින් අදින් ඇරඹෙන මෙම තරගයට පිවිසෙන්නේ තරගාවලිය ජය ගැනීමේ අරමුණ ඇතිවයි.
මෙම තරගයට ජය ගතහොත් හෝ ජයපරාජයෙන් තොරව නිමා වුවහොත් ශ්‍රී ලංකා කණ්ඩායමට වසර 14කට පසුව කිවියන්ට එරෙහිව ටෙස්ට් තරගාවලි ජයග්‍රහණයක පහස විඳ ගන්නට හැකියාව ලැබෙනවා.
ආබාධයකට ලක් වු වේගපන්දු යවන ක්‍රීඩක විශ්ව ප්‍රනාන්දු වෙනුවට ශ්‍රී ලංකා සංචිතයට කැඳවුම් ලද දඟ පන්දු යවන ක්‍රීඩක නිෂාන් පීරිස්ට හෙට ජගත් ටෙස්ට් ක්‍රිකට් වරම් හිමිවන බව ශ්‍රී ලංකා ක්‍රිකට් ආයතනය පවසනවා.
ඔහු ශ්‍රී ලංකාව වෙනුවෙන් ටෙස්ට් වරම් හිමිකර ගන්නා 167 වැනි ටෙස්ට් ක්‍රීඩකයා වනු ඇති.
මීට අමතරව මිලාන් රත්නායක ද මෙම තරගයට කැඳවා තිබෙන අතර ඒ අනුව රමේෂ් මෙන්ඩිස්ට සහ ලහිරු කුමාරට සිය ස්ථානයන් අහිමිව ගියා.
මේ අතර ICC ටෙස්ට් පන්දුයවන්නන්ගේ ශ්‍රේණිගත කිරීම්වල නවතම යාවත්කාලින කිරීමට අනුව ස්ථාන 5ක් ඉදිරියට පැමිණි ප්‍රභාත්
ජයසූරිය ටෙස්ට් පන්දු යවන්නන් අතර 8 වැනි ස්ථානයට පත්ව තිබෙනවා.
